काठमाडौं, २५ मंसिर । चिसो मौसम सुरु भइसके पनि डेंगु संक्रमण घट्न सकेको छैन ।
इपिडिमियोलोजी तथा रोग नियन्त्रण महाशाखा (ईडीसीडी)का अनुसार पछिल्लो एक सातामा ९६ जनामा डेंगु पुष्टि भएका छन् । गत पुसयता देशभर ८,२६२ संक्रमितमध्ये ६ जनाको मृत्यु भइसकेको छ । यस वर्ष डेंगु ७६ जिल्लामा फैलिएको छ ।
सबैभन्दा धेरै संक्रमित गण्डकी (२,१४५) र बागमती (२,१३२) प्रदेशमा छन् । लुम्बिनी, कोशी, सुदूरपश्चिम, कर्णाली र मधेशमा पनि क्रमशः सयौँ संक्रमित भेटिएको छ । चिसोमा पनि संक्रमण नघट्नुका कारण जलवायु परिवर्तन, तीव्र शहरीकरण, बसाइँसराइ र लामखुट्टेमा कम तापक्रम सहन सक्ने क्षमता विकास भएको विशेषज्ञहरू बताउँछन् ।
१२–१३ डिग्री सेल्सियसमा समेत डेंगु सार्ने लामखुट्टे सक्रिय रहन सक्ने भएकाले पहाडी र हिमाली क्षेत्रमा संक्रमण बढ्दो छ ।
