जनकपुर, १७ मंसिर। मधेश प्रदेशका मुख्यमन्त्री सरोज कुमार यादवले विश्वासको मत नपाउने स्थिति स्पष्ट भएपछि पदबाट राजीनामा दिएका छन्।
सर्वोच्च अदालतको परमादेशपछि उनले प्रदेशसभामै राजीनामाको घोषणा गर्दै प्रदेश प्रमुख सुरेन्द्र लाभ कर्णसमक्ष राजीनामा पेश गरेका थिए।
केही समयमै प्रदेश प्रमुख कर्णले राजीनामा स्वीकृत गरेका थिए।
प्रदेश प्रमुखको कार्यालयका निमित्त सचिव शत्रुधन यादवका अनुसार संविधानको धारा १६९(३) बमोजिम नयाँ व्यवस्था नभएसम्म यादव नेतृत्वको मन्त्रिपरिषद्ले कामचलाऊ रुपमा प्रदेशको कार्य सञ्चालन गर्नेछ।
सर्वोच्च अदालतको आदेशअनुसार अब संविधानको धारा १६८(२) बमोजिम नयाँ सरकार गठन गर्नुपर्ने अवस्था आएको प्रदेश प्रमुख कर्णले उल्लेख गरेका छन्।
यसैक्रममा आगामी शुक्रबार १९ गते साँझ ५ बजेभित्र सरकार गठनको दाबी पेश गर्न आह्वान गरिएको छ।
