काठमाडौं, १७ मंसिर । राष्ट्रिय प्रजातन्त्र पार्टी (राप्रपा) ले जेन–जी आन्दोलनपछिको राजनीतिक परिस्थितिलाई मध्यनजर राख्दै राजा, राजनीतिक दल र जेन–जीबीच ‘नवीन सहमति’ निर्माण गर्न दबाबमूलक सडक आन्दोलन सुरु गर्ने भएको छ ।
आगामी मंसिर २३ गते बृहत् जनप्रदर्शनको तयारी भइरहेको र यसको समन्वय–नेतृत्व प्रवक्ता ज्ञानेन्द्र शाहीले पाएका छन् । पार्टीले विशेष आन्दोलन परिचालन समिति गठन गर्दै त्यसको संयोजक शाहीलाई तोकेको छ ।
धुम्बाराहीमा बसेको पहिलो बैठकले आन्दोलनलाई शान्तिपूर्ण, संगठित र प्रभावशाली बनाउन कार्ययोजना, भीड तथा सुरक्षा व्यवस्थापन, मिडिया समन्वयलगायत उपसमिति गठन गरेको छ ।
राप्रपाले अन्तरिम सरकार प्रमुख सुशीला कार्कीलाई पाँच बुँदे ज्ञापनपत्र बुझाइसकेको र आगामी आन्दोलनलाई देशको स्थायित्वका लागि ‘ऐतिहासिक दबाब–कार्यक्रम’ का रूपमा लिएको जनाएको छ ।
