काठमाडौं, १७ मंसिर । निर्वाचन आयोगमा गत आर्थिक वर्षको आय–व्यय विवरण बुझाउने राजनीतिक दलको संख्या ३३ पुगेको छ ।
आयोगमा दर्ता १२२ दलमध्ये नेपाली कांग्रेस, नेकपा एमाले लगायत ८९ दलले भने अहिलेसम्म विवरण पेश गरेका छैनन् । नेकपा माओवादी केन्द्र, नेकपा एकीकृत समाजवादी लगायत एकीकृत भएर नयाँ दल बनेका दलहरूले पनि एकीकरणअघि अस्तित्वमा रहेका दलका नामबाट नै विवरण बुझाउनुपर्ने आयोगको व्यवस्था छ।
विवरण नबुझाए आयोगले त्यस्ता दलको नाम सार्वजनिक गर्नेछ । विवरण बुझाउने दलहरूमा नेपालका लागि नेपाली पार्टी, राष्ट्रिय जनमोर्चा, राष्ट्रिय जनता पार्टी नेपाल, मधेशी जनअधिकार फोरम मधेश, त्रिमूल नेपाल, जनजागरण पार्टी नेपाल, बहुजन शक्ति पार्टी, नेपाल जनमुक्ति पार्टी, नेपाल कम्युनिस्ट पार्टी (समाजवादी) लगायत धेरै दल समावेश छन् ।
राजनीतिक दल सम्बन्धी ऐन अनुसार प्रत्येक दलले आफ्नो आय–व्ययको वास्तविक अभिलेख राख्नुपर्छ र आर्थिक वर्ष समाप्त भएको छ महिनाभित्र लेखापरीक्षण गराई एक महिनाभित्र आयोगमा बुझाउनुपर्छ।
यसअनुसार दलहरूले आगामी माघ मसान्तभित्र लेखापरीक्षण प्रतिवेदन पेश गर्नु पर्नेछ । समयमै विवरण नबुझाए आयोगले ३५ दिनभित्र स्पष्टीकरण माग्नेछ भने विवरण बुझाउने दलको लेखापरीक्षण प्रतिवेदन आयोगले पेस भएको मितिले एक महिनाभित्र सार्वजनिक गर्नेछ ।
