जनकपुर,१७ मंसिर। मधेश प्रदेशका मुख्यमन्त्री सरोज कुमार यादवले आज विश्वासको मत लिने उद्देश्यले बोलाइएको प्रदेश सभा बैठक तोकिएको समयमा सुरु हुन सकेको छैन।
बिहान ८ बजे बोलाइएको बैठक पौने १० बजेसम्म पनि प्रारम्भ नभएपछि सभामुख कार्यालयमा चहलपहल बढेको छ।
प्रदेश सभा परिसरमा सुरक्षा व्यवस्था कडा पारिएको छ। जेन-जी आन्दोलनका क्रममा सुरक्षा उपकरण जलाइएपछि आजको बैठकअघि तालिमप्राप्त कुकुरमार्फत विशेष सुरक्षा जाँच गरिएको सुरक्षा इञ्चार्ज प्रहरी निरीक्षक विक्रम शाहले जानकारी दिए।
सर्वोच्च अदालतले २४ घण्टाभित्र विश्वासको मत लिन परमादेश जारी गरेपछि मुख्यमन्त्री यादव आज मतका लागि उपस्थित हुँदैछन्।
यसअघि सात दलको गठबन्धनबाट बनेका मुख्यमन्त्री जितेन्द्र सोनलले विश्वासको मत नपाउने अवस्था बनेपछि कात्तिक २२ गते राजीनामा दिएका थिए।
कात्तिक २४ गते एमाले संसदीय दलका नेता सरोजकुमार यादवलाई संविधानको धारा १६८(३) अनुसार तत्कालीन प्रदेश प्रमुख सुमित्रा सुवेदी भण्डारीले मध्यराततिर बर्दिवासको एक होटलमा शपथ दिलाएको विवादले राजनीतिक तरंगसहित रिटसम्म पुगेको थियो।
सोही रिटमा सुनुवाइ गर्दै सर्वोच्चले मंसिर १५ गते २४ घण्टाभित्र विश्वासको मत लिन आदेश दिएको हो।
