जनकपुर, १६ मंसिर । मधेश प्रदेशका मुख्यमन्त्री सरोज यादवले भोलि (बुधबार) प्रदेश सभामा विश्वासको मत लिने भएका छन् ।
उनले मंगलबार आयोजित पत्रकार सम्मेलनमार्फत विश्वासको मत परीक्षणको औपचारिक प्रक्रिया सुरु भएको जानकारी गराएका हुन् । मुख्यमन्त्री यादवका अनुसार मंगलबार दिउँसो करिब ३ बजे प्रदेश प्रमुखबाट विश्वासको मत लिनुपर्ने सम्बन्धी पत्र प्राप्त भएको थियो ।
सोही आधारमा उनले बुधबार दिउँसो २ बजे प्रदेश सभामा उपस्थित भई विश्वासको मत लिने निर्णय गरेका हुन् । पत्रकार सम्मेलनमा यादवले भने, “प्रदेश प्रमुखबाट आएको पत्रअनुसार संविधानले तोकेको समयभित्र नै विश्वासको मत लिने प्रक्रिया अघि बढाइएको छ ।
यादवले आजै प्रदेश सभा सचिवालयमा औपचारिक पत्र पठाएर विश्वासको मतका लागि प्रक्रिया मिलाइदिन अनुरोध गरेको जानकारी पनि दिएका छन् ।
प्रदेश सरकारभित्र देखिएको पछिल्लो राजनीतिक परिस्थिति र दलहरूबीचको समीकरण बदलिँदै गएको सन्दर्भमा यादवले विश्वासको मत लिन लागेका हुन् ।
प्रदेश सभामा विश्वासको मतका लागि आवश्यक समर्थन जुटाउन विभिन्न राजनीतिक दलहरूसँग परामर्श र समन्वय भइरहेको बताइएको छ । अब बुधबार दिउँसो हुने मतदानले प्रदेश सरकारको निरन्तरतासम्बन्धी अन्तिम निर्णय दिनेछ ।
