काठमाडौं, १५ मंसिर । पटक–पटक सारिँदै आएको नेपाली कांग्रेसको केन्द्रीय कार्यसमिति बैठक आज दिउँसो २ बजे पार्टी केन्द्रीय कार्यालय सानेपामा बस्दै छ।
महाधिवेशन नियमित गर्ने कि विशेष बोलाउने भन्ने विवादले बैठक निरन्तर स्थगित हुँदै आएको थियो।
पछिल्ला छलफलमा पुस अन्तिम सातामा १५औँ महाधिवेशन गर्ने प्रारम्भिक सहमति बनेको कांग्रेस नेताहरूले बताएका छन्।
आजको बैठकमा कार्यवाहक सभापति पूर्णबहादुर खड्काले पुस २६–२९ गते नियमित महाधिवेशन गर्ने प्रस्ताव पेस गर्ने तयारी गरेका छन्।
बैठकअघि उनले शीर्ष नेताहरू—महामन्त्रीद्वय गगन थापा र विश्वप्रकाश शर्मा, नेता रमेश लेखक तथा प्रचार विभाग प्रमुख मीन विश्वकर्मासँग अनौपचारिक छलफलसमेत गरेका थिए।
असोज २८ गतेदेखि सुरु भएको बैठक निर्णयविहीन बन्दै लम्बिँदै आएको छ।
