काठमाडौं, १४ मंसिर । प्रतिनिधिसभा सदस्य निर्वाचनका लागि राजनीतिक दल दर्ता गर्ने म्याद आज (मंसिर १४) सकिँदैछ ।
प्रारम्भिक म्याद मंसिर १–१० रहेकोमा दर्ता प्रक्रिया जारी भएकाले निर्वाचन आयोगले थप चार दिन समय दिएको थियो । शुक्रबारसम्म १०८ दल दर्ता भइसकेका छन्, जुन २०७९ सालको चुनावमा सहभागी ८४ दलभन्दा धेरै हो ।
अझै केही दलहरू दर्ता प्रक्रियामा भएकाले संख्या बढ्न सक्ने अनुमान छ । जेनजी आन्दोलनपछि मात्रै २३ नयाँ दलले आधिकारिकता पाएका छन् भने १६ दलहरू दर्ता प्रक्रियामा छन् ।
आयोगले पछिल्लो दिनहरूमा विभिन्न नयाँ दलहरू दर्ता गरेको जानकारी दिएको छ । आजसम्म दर्ता भएमा सबै दलले आउँदो फागुन २१ को प्रतिनिधिसभा चुनावमा भाग लिन पाउनेछन् ।
