जनकपुर, १३ मंसिर। अनैतिक तथा यौनजन्य क्रियाकलाप रोक्न माग गर्दै जनकपुरमा स्थानीयबासीले विरोध प्रदर्शन गरेका छन्।
जनकपुरको पिराडीचोक क्षेत्रमा रहेको केही होटल तथा गेस्टहाउसहरूमा लामो समयदेखि देह व्यापार चलिरहेको भन्दै स्थानीयहरू सडकमा उत्रिएका हुन्।
स्थानीयवासीहरूले यस्ता गतिविधिले जनकपुरको सामाजिक वातावरण, पारिवारिक संरचना र सुरक्षा व्यवस्थामा नकारात्मक प्रभाव पारेको आरोप लगाएका छन्।
उनीहरूको भनाइमा, निरन्तर भइरहेका गैरकानुनी यौनजन्य क्रियाकलापका कारण बस्तीको प्रतिष्ठामै आँच पुगेको छ। जनक नगर सोसाइटी पिराडीले देहव्यापार विरुद्ध जनचेतना अभियान सुरु गरेको जनाएको छ।
अभियानका क्रममा उनीहरूले अनैतिक क्रियाकलापमा संलग्न होटल तथा गेस्टहाउस सञ्चालकलाई तत्काल यस्ता क्रियाकलाप बन्द गर्न चेतावनी दिएका छन्।
साथै, ‘कमिसनको नाममा अनैतिक क्रियाकलापलाई प्रश्रय दिएको’ भन्दै धनुषा प्रहरीले विषयमा कडाइका साथ कारबाही नगरेको आरोप लगाउँदै प्रदर्शनकारीहरूले प्रहरी प्रशासनविरुद्ध नाराबाजी समेत गरेका छन्।
स्थानीयले देहव्यापारमा संलग्न दलाल तथा सञ्चालकलाई कानुनी दायरामा ल्याउन, संलग्न संरचनामाथि कडा निगरानी राख्न तथा समाजमा बढ्दो यौनजन्य अपराध रोकथामका लागि ठोस कदम चाल्न सम्बन्धित निकायलाई माग गरेका छन्।
