काठमाडौँ, १२ मंसिर । तराई मधेस लोकतान्त्रिक पार्टी (तमलोपा) का अध्यक्ष वृषेशचन्द्र लालले मधेस–थरुहट तथा आदिवासी जनजाति पक्षधर दलहरूबीच एकता र सहकार्य आवश्यक रहेको बताउँदै सबैलाई एकजुट हुन आग्रह गरेका छन् ।
उनले आज जारी गरेको विज्ञप्तिमा संघीयतावादी शक्तिहरूबीच सार्थक संवाद गर्नुपर्ने आवश्यकता औंल्याएका छन् । अध्यक्ष लालले मधेस, थरुहट र आदिवासी जनजातिको पहिचान, सम्मान र समान अधिकारका लागि लामो समयदेखि संघर्षरत शक्तिहरूलाई कमजोर पार्ने विभिन्न षड्यन्त्र भइरहेका दाबी गर्दै, आन्तरिक तथा बाह्य कारणले यी शक्तिहरू बिखण्डित भएको टिप्पणी गरेका छन् ।
उनले न्यायपूर्ण एजेन्डामा प्रतिबद्ध रहँदै एकताका दिशामा अघि बढ्न सबैलाई आह्वान गरेका छन् । महन्थ ठाकुरको नेतृत्वमा रहेको तत्कालीन राष्ट्रिय जनता पार्टी (राजपा) बाट अलग भएपछि लालले तमलोपा पुनर्गठन गरेका थिए।
केही दिनअघि लोसपा नेपालका अध्यक्ष महन्थ ठाकुरले पनि पार्टी छाडेर गएका नेताहरूलाई पुनः फर्किन सार्वजनिक अपिल गरेका थिए, त्यसपछ्याउँदै अध्यक्ष लालको यो अपिल आएको हो । लालले विचार र एजेन्डा मिल्ने कुनै पनि दलसँग संवाद गर्न आफूहरू तयार रहेको स्पष्ट पारेका छन्।
सङ्घीय लोकतान्त्रिक मोर्चामा आवद्ध दलहरूले एकताबद्ध हुनुपर्ने धारणा राख्दै उनले सम्भव भएसम्म पार्टी एकता वा कम्तिमा एउटै चुनाव चिन्हबाट निर्वाचनमा सहभागी हुनुपर्नेमा जोड दिएका छन्।
