जनकपुर, १२ मंसिर। मधेश प्रदेशका मुख्यमन्त्री सरोजकुमार यादवविरुद्ध दायर रिटमा आज पनि सर्वोच्च अदालतमा सुनुवाइ जारी छ।
न्यायाधीश हरिप्रसाद फुयाँल र नित्यानन्द पाण्डेको इजलासमा मुद्दा सुनुवाइ भइरहेको भए पनि शुक्रबार पनि टुंगो नलगिँदा हेर्दाहेर्दैमा राखिएको छ।
यसअघि कांग्रेस संसदीय दलका नेता कृष्णप्रसाद यादवसहित ७४ सांसदले मुख्यमन्त्री नियुक्ति असंवैधानिक भएको दाबी गर्दै रिट दायर गरेका थिए।
त्यस्तै, रकीप्रसाद यादवलगायतले दायर गरेको अर्को रिटमा न्यायाधीश टेकप्रसाद ढुंगानाको इजलासले दीर्घकालीन प्रभाव पार्ने निर्णय नगर्न अन्तरिम आदेश दिएको छ।
लोसपा नेता जितेन्द्र सोनलले विश्वासको मत नपाउने स्थिति देखेपछि राजीनामा दिएपछि प्रदेश प्रमुख सुमित्रा सुवेदी भण्डारीले एमालेका सरोजकुमार यादवलाई मुख्यमन्त्री नियुक्त गरेकी थिइन्।
शपथ ग्रहण महोत्तरीको पानस होटलमा गराइएको घटना सार्वजनिक भएपछि प्रदेश प्रमुख भण्डारीको व्यापक आलोचना भएको थियो।
बादमा सरकारबाट उनलाई पदमुक्त गरी नयाँ प्रदेश प्रमुखमा सुरेन्द्र लाभ कर्ण नियुक्त गरिएको हो।
