जनकपुर, १० कार्तिक । मधेश प्रदेशकी नवनियुक्त वन तथा वातावरण मन्त्री कञ्चन बिच्छा साहले पदभार ग्रहण गरेका दिनैदेखि चर्चामा आएकी छन् ।
उनले कार्यभार सम्हाल्नेबित्तिकै मन्त्रालयको कार्यालय कक्षमा राष्ट्रपति रामचन्द्र पौडेल, प्रधानमन्त्री शुशिला कोईरालाका फोटोसँगै राजा पृथ्वी नारायण शाहको फोटो समेत टाँसेकी हुन् ।
संघीय लोकतान्त्रिक गणतन्त्र लागू भइसकेको अवस्थासँगै प्रदेश सरकारहरू प्रत्यक्षरूपमा गणतान्त्रिक संरचना अन्तर्गत संचालन भइरहेका बेला मन्त्री साहद्वारा कार्यकक्षमा राजतन्त्रकालीन प्रतीक–राजाको फोटो राखिएको कदमले राजनीतिक वृत्तमा विभिन्न प्रश्न र व्याख्या उत्पन्न गरेको छ ।
मन्त्री साह राष्ट्रिय प्रजातन्त्र पार्टी (राप्रपा)बाट प्रदेश सरकारमा सहभागी भएकी हुन् । राप्रपा ज्ञात रूपमा राजावादी तथा हिन्दुराष्ट्रवादी नाराका साथ पहिचान बनाएको दल भएकाले, मन्त्री साहको यो कदम दलको वैचारिक पृष्ठभूमिसँग मेल खाने प्रकारको ‘प्रतीकात्मक अभिव्यक्ति’ भएको राजनीतिक विश्लेषकहरूले बताउने गरेका छन् ।
यद्यपि संघीयता संस्थागत हुँदै गएको वर्तमान संरचनामा प्रदेश कार्यकक्षमा राजा पृथ्वी नारायण शाहको तस्वीर राखिनु गणतन्त्रप्रति असहजता देखाउने संकेत वा वैचारिक सन्देश हो कि, भन्ने बहस सार्वजनिक रूपमा थालिएको छ ।
सरकारी कार्यालयहरूमा कुन–कुन व्यक्तिहरूका फोटो राख्ने भन्ने स्पष्ट कानुनी व्यवस्था नभए पनि परम्परागत रूपमा राष्ट्र प्रमुख र प्रमुख कार्यकारीका तस्वीर मात्र राख्ने चलन रहेको छ ।
यस विषयमा मन्त्री साहले आधिकारिक प्रतिक्रिया नदिए पनि उनको सचिवालयका प्रमुख राकेश राउतले “नेपाली इतिहासमा राजा पृथ्वी नारायण शाह राष्ट्रिय एकीकरणका प्रतीक भएकाले तस्वीर राखिनु स्वाभाविक” भन्ने मत राखेको बताइएको छ ।
