काठमाडौं, ८ मंसिर । ऊर्जा, जलस्रोत तथा सिँचाइ मन्त्री कुलमान घिसिङले भारतको पिटिसी कम्पनीसँग गरिएको विद्युत् खरिद सम्झौताबाट सरकारलाई करिब १ अर्ब २० करोड रुपैयाँ फाइदा भएको स्पष्ट पारेका छन् ।
राष्ट्रिय सभाको समितिमा सांसदहरूले गरेका प्रश्नको जवाफ दिँदै उनले सम्झौता गैरकानूनी र आर्थिक चलखेल भएको भन्ने आरोप निराधार भएको बताए ।
उनका अनुसार पिटिसीको ८ रुपैयाँ १० पैसाको दरभन्दा हालको ६ रुपैयाँ ९५ पैसामा विद्युत् किन्दा सरकार लाभमा छ ।
समयमै विद्युत् खरिद नगरे मुलुक लोडसेडिङमा जानुपर्ने अवस्था आउने भएकाले तत्कालीन आवश्यकता अनुसार भारतसँग दिन–प्रतिदिनको आधारमा समेत ऊर्जा खरिद गरिरहेको उनले जानकारी दिए ।
