जनकपुर, ५ मंसिर । धनुषा र सिरहा जोड्ने महत्वपूर्ण संरचना मानिएको कमला नदीको पुल १४ वर्षदेखि निर्माण नहुनु प्रदेशका स्थानीयवासीका लागि निरन्तर दुखाइको विषय बनेको छ ।
यिनै समस्याहरू प्रत्यक्षरूपमा बुझ्न भौतिक पूर्वाधार तथा यातायातमन्त्री कुलमान घिसिङ शुक्रबार जनकपुर पुगेका छन् । उनले बिहानै स्थानीय प्रतिनिधि तथा नागरिकसँगै डुंगा चढेर कमला नदी पार गर्दै पुल निर्माण स्थलको निरीक्षण गरेका हुन् ।
पुल अभावका कारण बर्खायाममा नदी पार गर्न धेरै जोखिम र आर्थिक बोझ व्यहोर्नुपर्दै आएको छ । विद्यार्थीदेखि गर्भवती महिला र बिरामीहरू सबैका लागि डुंगा नै एकमात्र सहारा बन्नु परेको स्थानीयले गुनासो गर्दै आएका छन् ।
वर्षौंदेखि बजेट, ठेकेदार र सरकारी प्रक्रियामा देखिएको लापरबाहीका कारण काम अगाडि बढ्न नसकेको उनीहरूको आरोप छ । स्थलगत अवलोकनपछि मन्त्री घिसिङले कमला नदीको पुल निर्माणलाई प्राथमिकतामा राख्दै काम छिटो पूरा गर्ने दिशामा कडाइका साथ पहल गर्ने आश्वासन दिएका छन् ।
उनले पुल निर्माण ढिलाइका कारण जनताले भोगिरहेको कष्टप्रति गम्भीर ध्यानाकर्षण भएको बताए । सोही दिन ऊर्जामन्त्री समेत रहेका घिसिङ र युवा तथा खेलकुद मन्त्री बब्लु गुप्ता जनकपुरस्थित निर्माणाधीन राम–जानकी रंगशालाको पनि निरीक्षण गर्न पुगेका थिए । दुवै मन्त्रीले रंगशालाको प्रगति सुस्त भएकोमा चिन्ता व्यक्त गर्दै काम तिव्र गति दिने प्रतिबद्धता जनाए ।
