जनकपुर, १३ कार्तिक । मधेश प्रदेशको सामुदायिक शिक्षाको अवस्था सुधार गर्न शिक्षा, विज्ञान तथा प्रविधिमन्त्री महावीर पुनले विशेष अध्ययन टोली गठन गर्ने तयारी गरेका छन् ।
मन्त्री पुनका अनुसार उक्त टोलीमा मधेश प्रदेशकै राजनीतिक दलका प्रतिनिधि र शिक्षा क्षेत्रका विज्ञहरू रहने छन् । टोलीले प्रदेशभरको सामुदायिक शिक्षाको स्थिति, समस्या र सुधारका उपायबारे अध्ययन गरी छिट्टै प्रतिवेदन पेश गर्नेछ ।
मन्त्री पुनले सामाजिक सञ्जालमार्फत लेख्दै मधेश प्रदेशको सामुदायिक शिक्षाको अवस्था कमजोर रहेकोप्रति चिन्ता व्यक्त गरेका छन् । उनका अनुसार मधेशका आठवटै जिल्लामध्ये कुनै पनि जिल्ला अझै ‘साक्षर जिल्ला’को रूपमा घोषणा हुन सकेका छैनन जुन अवस्था देशका अन्य प्रदेशसँग तुलना गर्दा निकै कमजोर देखिएको हो ।
नेपालभरका अधिकांश जिल्लाले साक्षर घोषणा पाइसके पनि कर्णाली प्रदेशका दुई जिल्ला र मधेश प्रदेशका सबै जिल्लाहरू अझै त्यस सूचिबाहिर छन् ।
मन्त्री पुनले मधेश प्रदेश सुगम भूभागमा पर्नेसंहिता हुँदै पनि शिक्षा सूचकमा पछाडि पर्नुको कारण पहिचान गर्न आवश्यक भएको बताए ।
उनले भने, “मधेश जस्तो सुगम ठाउँमा पनि किन यस्तो भयो? मधेशमा खस्केको सामुदायिक शिक्षाको सुधारका लागि के–के गर्नुपर्ला भन्नेबारे अध्ययन गर्न मधेशकै दल र विज्ञहरूको टोली गठन गर्दैछु ।
मन्त्री पुनले अध्ययन टोलीको प्रतिवेदनका आधारमा नीति, संरचना र स्रोत परिचालनका उपाय तय गरिने बताएका छन् ।
