जनकपुर, २१ असोज । रौतहटको देवाही गोनाही नगरपालिका–६ कर्कच गाउँमा सोमबारदेखि बेपत्ता रहेका दुई बालिकाको शव आज फेला परेका छन् ।
स्थानीय रामदयाल रामकी १२ वर्षीया छोरी आरती राम र शिवधारी रामकी ११ वर्षीया छोरी अन्तिमा कुमारी राम सोमबार दिउँसो खेतको पानी बग्ने ठाउँमा नुहाउने क्रममा हराएका थिए ।
निरन्तर खोजीपछि आज बिहान सुरक्षाकर्मीले आरतीको शव फेला पारेका थिए भने अन्तिमाको शव केही टाढा जलकुम्भीमा अड्किएको अवस्थामा भेटिएको जिल्ला प्रहरी कार्यालय रौतहटले बताए ।
यस्तै, राजपुर नगरपालिका–८ बलुवा गोठ टोलका गोनउर मियाका १० वर्षीय छोरा अरबाज मियाको पनि सोमबार दिउँसो लालबकैया नदीमा नुहाउने क्रममा डुबेर मृत्यु भएको जिल्ला प्रहरी कार्यालय रौतहटका डिएसपी राजु कार्कीले जानकारी दिए ।
हालसम्म रौतहटमा बाढीको पानीमा डुबेर चार जनाको मृत्यु भइसकेको छ भने चट्याङ लागेर दुई युवकको ज्यान गएको प्रहरीले जनाएको छ ।
