काठमाडौं, २१ असोज । जयपुरस्थित सावई मान सिंह सरकारी अस्पताल (एसएमएस अस्पताल) को ट्रमा सेन्टरको आईसीयूमा आइतबार राति भीषण आगलागी हुँदा ६ जनाको ज्यान गएको छ ।
आगलागीका कारण बिरामीहरू जलेर र धुवाँको कारण श्वासप्रश्वास रोकिएर मृत्यु भएको प्रारम्भिक जानकारी छ । अस्पताल प्रशासनका अनुसार आगलागी आइसीयूको स्टोरेज सेक्शनबाट सुरु भएको हो, जसको कारण विद्युतीय सर्टसर्किट भएको अनुमान गरिएको छ ।
एसएमएस अस्पताल राजस्थानकै सबैभन्दा ठूलो सरकारी स्वास्थ्य संस्था हो । मृतकका आफन्तहरूले सोमबार अस्पताल बाहिर प्रदर्शन गर्दै प्रशासन र राज्य सरकारविरुद्ध नाराबाजी गरेका थिए ।
उनीहरूले अस्पतालमा लापरबाही भएको र आगो निभाउने कुनै उपकरण नहुँदा दुर्घटना भएको आरोप लगाएका छन ।
