जनकपुर, १९ असोज । अविरल वर्षासँगै आएको बाढीका कारण महोत्तरी जिल्लाको पिपरा गाउँपालिका डुवानमा परेको छ ।
बाढी र पानी जमेर सवारी आवागमनमा अवरोध पुगेको छ भने सर्वसाधारणको दैनिक जीवन कष्टकर बनेको छ । पिपरा बजारदेखि पर्सा जाने मुख्य सडक पूर्णरूपमा जलमग्न हुँदा आवतजावत ठप्प भएको स्थानीयले जानकारी दिएका छन् ।
त्यस्तै, पर्सा क्षेत्रमा रहेको पुलमाथि बाढीको पानी पस्दा जनकपुर र जलेश्वरतर्फ जाने तथा त्यहाँबाट आउने सवारी साधनहरू बीच बाटोमै रोकिएका छन् ।
जलेश्वर नगर क्षेत्र समेत डुवानमा परेको छ । सडक, घर र व्यापारिक क्षेत्रहरूमा पानी जम्दा स्थानीयवासी समस्यामा परेका छन् । विद्यालय तथा स्वास्थ्य संस्थाहरूको सेवा प्रभावित भएको जनाइएको छ ।
स्थानीय प्रशासनले नागरिकलाई सुरक्षित स्थानमा बस्न अनुरोध गरेको छ भने उद्दार तथा राहत कार्यका लागि तयारी भइरहेको जनाएको छ ।
बाढी अझै नघटेकाले थप क्षति हुन सक्ने जोखिम स्थानीयले औंल्याएका छन् । 
