काठमाडौं, १९ असोज । हालैको अविरल वर्षाका कारण नेपालमा भएको जनधनको क्षतिप्रति भारतीय प्रधानमन्त्री नरेन्द्र मोदीले गहिरो दुःख प्रकट गरेका छन् ।
सामाजिक सञ्जालमार्फत प्रतिक्रिया जनाउँदै उनले भनेका छन्, “नेपालमा आएको विपत्तिप्रति म निकै दुःखी छु । वर्षा र पहिरोका कारण जनधनको ठूलो क्षति भएको समाचार पीडादायी छ ।”
मोदीले भारत सरकार नेपाललाई आवश्यक परे जुनसुकै सहयोग गर्न तयार रहेको उल्लेख गरेका छन् । उनका अनुसार, “एक मित्रवत् छिमेकी देश र पहिलो प्रतिक्रियाकर्ताका रूपमा भारत नेपाललाई आवश्यक पर्ने सबै सहयोग उपलब्ध गराउन प्रतिबद्ध छ ।” उनले थपे, “यस कठिन घडीमा भारत नेपालका जनता र सरकारको साथमा उभिएको छ ।”
गत शुक्रबार र शनिबारको लगातार वर्षाले देशभर बाढीपहिरोका घटनाहरू बढाएका थिए । यसमा परेर हालसम्म ४९ जनाले ज्यान गुमाएका छन् भने दर्जनौं घाइते भएका छन् । धेरै राजमार्ग अवरुद्ध भए पनि आज केही स्थानमा आवागमन पुनः सुरु हुन थालेको छ ।
