काठमाडौं, २६ साउन। जनता समाजवादी पार्टी (जसपा) नेपालका अध्यक्ष उपेन्द्र यादव र नेकपा (माओवादी केन्द्र)का वरिष्ठ उपाध्यक्ष नारायणकाजी श्रेष्ठबीच आज बिहान ललितपुरको हात्तीवनस्थित श्रेष्ठ निवासमा भेटवार्ता भएको छ ।
भेटका क्रममा दुबै नेताबीच वर्तमान राजनीतिक अवस्था, समावेशी लोकतन्त्रको संरक्षण, र संघीयताको सुदृढीकरणबारे गम्भीर समीक्षा गरिएको श्रेष्ठको सचिवालयले जानकारी दिएको छ ।
संघीय लोकतान्त्रिक गणतन्त्र र समाजवादउन्मुख समावेशी लोकतन्त्रको संरक्षण तथा सुदृढीकरणका लागि संघर्षरत शक्तिहरूको भूमिका र यथास्थितिको अन्त्य गर्दै समृद्ध नेपाल निर्माणतर्फ अघि बढ्न आवश्यक कदमबारे छलफल भयो ।
भेटवार्तामा संघर्षशील शक्तिहरूबीचको एकता, आ–आफ्ना कमजोरीप्रति आत्मालोचना, र नयाँ राजनीतिक पहलको खाँचोबारे पनि विचारविमर्श गरिएको जनाइएको छ । तर, यसभित्र केही विरोधाभासपूर्ण दाबी पनि देखिएका छन्।
जसपा अध्यक्ष यादवले भने उक्त भेटलाई राजनीतिक भन्दा पनि “सामान्य भेटघाट“को रूपमा वर्णन गरेका छन्। नेपालखबरसँग कुराकानी गर्दै यादवले भने, “उहाँ मेरो छिमेकी हो। म पनि हात्तीवनमै बस्छु। हामीबीच सामान्य भेटघाट मात्रै भएको हो। कुनै राजनीतिक छलफल भएको छैन ।
यसरी सचिवालयको गम्भीर राजनीतिक छलफलको दाबी र यादवको सामान्य शिष्टाचारिक भेटको दाबीबीच विरोधाभास देखिएको छ, जसले यो भेटलाई लिएर राजनीतिक वृत्तमा अनेक अड्कलहरू जन्माएको छ ।
नारायणकाजी श्रेष्ठ हालै नेकपा महासचिव नेत्र विक्रम चन्द ‘विप्लव’, नेकपा (कीकृत समाजवादी) का महासचिव घनश्याम भुषाल र वरिष्ठ नेता झलनाथ खनालसँग पनि छुट्टाछुट्टै भेटवार्तामा संलग्न भइसकेका छन्। यसले आगामी राजनीतिक पुनःगठनका सम्भावनाबारे नयाँ बहस उत्पन्न गराएको छ ।
