सप्तरी , २० साउन । जनता समाजवादी पार्टी, नेपाल सप्तरी जिल्लाको अध्यक्षमा केदार यादव निर्वाचित भएका छन् ।
उनी यसअघि पनि सो पार्टीका जिल्ला अध्यक्ष नै थिए । जिल्ला कार्य समितिका लागि भएको मतदानमा उनका प्रतिस्पर्धी उमेश यादवलाई ३० मतले पराजित गर्दै उनी विजय भएको जसपा नेपालले जानकारी गराएको छ ।
मंगलबार राजविराजमा सम्पन्न निर्वाचनमा अध्यक्ष पदका लागि ५०४ मत परेको थियो । जसमा २३५ मत ल्याएर केदार यादव अध्यक्षमा निर्वाचित भएका हुन् ।
यसैगरी, जिल्ला उपाध्यक्षमा लक्ष्मण यादव र हरेराम यादव विजयी भएका छन् । जिल्ला सचिवमा नीरज मुक्तिले जम्मा १ मतले निर्वाचित भएका छन् ।
त्यस्तै, उपसचिवमा रिता चौधरी र रामेश्वर यादव विजयी भएका छन् भने कोषाध्यक्षमा अमरेन्द्र यादव निर्वाचित भएका छन् । जिल्ला कार्यसमितिका सदस्यहरूको आज दिउसोदेखि मतगणना सुरु हुने जनाएको छ ।
