काठमाडौँ, २८ माघ । राष्ट्रपति रामचन्द्र पौडेलले भ्रष्टाचार निवारण र अख्तियारसम्बन्धी विधेयक रोकिएको बारे चासो व्यक्त गरेका छन् ।
सोमबार अख्तियार दुरुपयोग अनुसन्धान आयोगको ३४औं स्थापना दिवसको अवसरमा आयोजित कार्यक्रमलाई सम्बोधन गर्दै पौडेलले यी विधेयकबारे चासो व्यक्त गरेको हो । ’भ्रष्टाचारसमन्त्री विधेयकहरू लामो समयसम्म पनि किनारा नलाग्दा समस्या आएको गुनासो आएको हुनाले यससम्बद्ध पक्षको ध्यानाकर्षण गराउँछु’ उनले भनेको हो ।
विगत ६ वर्षदेखि भ्रष्टाचार निवारण र अख्तियार ऐन छलफलमा रहे पनि सहमति नजुट्दा अख्तियार ऐन संसद्मा पेस हुन सकेको छैन । थन्किएको छ । भ्रष्टाचार विधेयक राज्य व्यवस्था समितिमा छलफलपछि पारित भइसकेको छ ।
तर, अख्तियार ऐनलाई भने छलफलमा पनि ल्याइएको छैन । राजनीतिक स्वार्थका कारण संवैधानिक परिषद्सम्बन्धी विधेयकलाई पनि छलफलका लागि संसद्मा पेस गरिएको छैन । राष्ट्रपति पौडेलले नेपाल भ्रष्टाचार नियन्त्रणसम्बन्धी अन्तर्राष्ट्रिय महासन्धीको पक्ष राष्ट्र भएकोले त्यसमा उल्लेखित प्रावधानअनुसार कानुन र संयन्त्र परिमार्जन गर्न आवश्यक रहेको बताए ।
