कञ्चनपुर, १९ माघ । नेपाली कांग्रेस भीमदत्त नगर कार्यसमिति सभापति अच्युत कलौनीको शव पोस्टमार्टम गर्नका लागि फरेन्सिक विज्ञ टोली मगाइएको छ ।
भेरी अस्पतालबाट फरेन्सिक विज्ञ टोली मगाइएको जिल्ला प्रहरी कार्यालय कञ्चनपुरका डीएसपी उमेश जोशीले बताए । उनका अनुसार घटनास्थलको काम सकेर अहिले कलौनीको शव पोस्टमार्टमका लागि महाकाली प्रादेशिक अस्पालमा राखिएको छ ।
शनिबार बिहान भीमदत्त नगरपालिका–१८ स्थित सडकको पेटीमा घोप्टो परेको अवस्थामा कलौनीको शव फेला परेको थियो भने शव नजिकै उनको खाली ‘वालेट’ फेला परेको छ ।
परिवारले प्रहरीलाई दिएको जानकारी अनुसार कलौनीले दुई मोबाइल बोक्थे । तीमध्ये ‘एन्ड्रोइड’ अपरेटिङ सिस्टम भएको मोबाइल फेला परे पनि अर्को सानो मोबाइल नभेटिएको डीएसपी जोशीले बताए ।
प्रहरीले उक्त मोबाइल खोजिरहेको छ । कलौनी शुक्रबार राति ९ः३२ मा घटनास्थल नजिकैको सीसीटीभी फुटेजमा एक्लै हिँडिरहेका कैद भएका छन् । प्रहरीले बिहान घटनास्थलमा तालिमप्राप्त कुकुर पनि परिचालन गरेको थियो र सुदूरपश्चिम प्रदेश प्रहरी कार्यालयका डीआईजी गणेश चन्द पनि घटनास्थलमा पुगेका थिए ।
