विराटनगर, २० पौस । मोरङ कारागारमा कैद भुक्तान गरिरहेका एक जना कैदीको मृत्यु भएको छ ।
हाडनाता करणी मुद्दामा दोषी ठहर भइ कैद भुक्तान गरिरहेका बेलबारी नगरपालिका–४ का ६७ वर्षीय अम्मरबहादुर राईको मृत्यु भएको छ । श्वासप्रश्वासमा समस्या भएपछि राईलाई उपचारका लागि दिउँसो २:१५ बजेतिर कोशी अस्पतालमा भर्ना गरिएको जेलर गौरव ढुंगेलले बताए ।
उपचारका क्रममा उनको दिउँसो मृत्यु भएको छ । जिल्ला अदालत मोरङले २०७३ साल माघ ९ गते उनलाई १४ वर्ष कैद सजाय सुनाएको थियो ।
राई २०७३ जेठ २३ गतेबाट कारागारमा थिए । महिला र पुरुष गरी ३ सय क्षमता रहेको मोरङ कारागारमा १ हजार १ सय १० जना कैदीबन्दी छन् ।
