जनकपुरधाम, २१ असोज । जनकपुरधामको रामानन्दचोक स्थित रहेको जनकपुर बिग मार्टमा राति आगलागी भएको छ ।
राति ११ बजे अकस्मात् लागेको आगो आज बिहान नियन्त्रणमा आएको छ । जनकपुरधाम उपमहानगरपालिका लगायत आसपासको पालिकाको बारुणयन्त्र, प्रहरी, स्थानीय लगायतको सहयोगमा आगलागी नियन्त्रण भएको छ ।
आगलागीबाट सम्पूर्ण सामान जलेर नष्ट भएको छ भने घरमा पनि पूर्ण रुपले क्षति पुगेको छ । सञ्चालक रामबाबु रायले राति ११ बजे मार्टभित्र अचानक आगो सल्केको थाहा पाएको बताएका छन ।
सञ्चालक रायको अनुसार मार्टको सामान साढे चार करोड, घरमा समेत क्षति पुगेकाले १० करोड भन्दा बढीको क्षति पुगेको छ । मार्टको दोस्रो तल्लमा बसिरहेका राय दम्पती भागेर ज्यान बचाएको बताएका छन् ।
विद्युत सर्ट भएर आगलागी भएको हुन सक्ने अनुमान गरिएको छ । प्रहरीले घटनाको अनुसन्धान गरिरहेको जनाएको छ ।
