काठमाडौँ, ४ भादौ । कामु–प्रधानन्यायधीश विश्वम्भरप्रसाद श्रेष्ठलाई प्रधानन्यायधीशमा राष्ट्रपति रामचन्द्र पौडेलले नियुक्त गरेका छन् ।
संवैधानिक व्यवस्था अनुसार राष्ट्रपति पौडेले सोमवार साँझ श्रेष्ठलाई प्रधानन्यायधीशमा नियुक्त गरेका र भोलि मंगलबार सपथ गराइने राष्ट्रपति कार्यालयका प्रवक्ता शैलजा रेग्मी ’भट्टराईले जानकारी दिनुभएको छ ।
उनको संसदीय सुनुवाइ भएको र सर्वसम्मतरुपमा अनुमोदन गरिएको थियो । समितिमा श्रेष्ठले १८ पेज आफ्नो कार्ययोजना प्रस्तुत गरेका थिए ।
त्यसपछि समितिले उनको नाम सर्वसम्मत रुपमा अनुमोदन गरेको थियो । श्रेष्ठले कार्ययोजना प्रस्तुत गर्दै न्यायपालिकाको सुधारसम्बन्धी प्रस्तुत कार्ययोजनालाई इमानदारीपूर्वक कार्यान्वयन गर्न प्रतिबद्धता व्यक्त गरेका थिए ।
उनले समिति समक्ष कार्ययोजना प्रस्तुत गर्दै महिलावादी भएका मुद्दाका सुनुवाईका लागि पारिवारिक इजलासको स्थापना गर्ने बताएका छन् ।
साथै थुनुवा, वृद्ध, अशक्त असहाय व्यक्तिहरुको मुद्दाको पेशीमा प्राथमिकता दिइने श्रेष्ठले उल्लेख गरेका छन् ।
