जनकपुरधाम, २३ फागुन । मिथिलाञ्चलको धार्मिक एवम् ऐतिहासिक ‘मिथिला माध्यमिकी’ परिक्रमा आज –मंगलवार)सम्पन्न हुँदै छ । अन्तिम दिन आज बिहानैदेखि जनकपुरधामको अन्तरगृह परिक्रमा गरी सम्पन्न हुन लागेको हो ।
फागु पूर्णिमाको दिन गरिने अन्तगृहलाई पञ्चकोशी परिक्रमा समेत भन्ने गरिन्छ । मध्य परिक्रममा सहभागी नहुने यस वर्ष पनि हजारौंको संख्यामा श्रद्धालुभक्तजन अन्तरगृह परिक्रमा गरेका छन् ।
अन्तरगृह परिक्रममा सहभागी हुँदा पनि पुण्यको भागी बनिन्छ भन्ने जनविश्वास रहिआएको छ । अन्तगृह परिक्रमाको भोलिपल्ट जनकपुर वरपर मिथिलाञ्चल क्षेत्रमा होली मनाउने परम्परा रहेको छ ।
फागुन ८ गते सुरु भएको मिथिला माध्यमिकी परिक्रमा सोमबार १५औं दिन जनकपुरधाम आइपुगेको थियो । धनुषा, महोत्तरीका दर्जनौ धार्मिक ऐतिहासिक ठाँउहरुको ९० किलोमिटर र छिमेकी मुलुक भारतको ३० किलोमिटर गरी जम्मा १२० किलोमिटर भू–भागको परिक्रमा यात्रा गरिन्छ ।
