काठमाडौं, २५ कात्तिक। परराष्ट्रमन्त्री शिशिर खनाल र फिनल्यान्डका वैदेशिक व्यापार तथा विकासमन्त्री भिले ताभियोबीच टर्कीको अन्ताल्यामा द्विपक्षीय भेटवार्ता भएको छ।
जलवायु परिवर्तनसम्बन्धी संयुक्त राष्ट्रसङ्घीय सम्मेलन (कोप–३१) मा सहभागी हुन अन्ताल्यामा रहेका मन्त्री खनालले बुधबार फिनल्यान्डका मन्त्री ताभियोसँग भेट गरेका हुन्।
भेटका क्रममा मन्त्री खनालले नेपालमा हालै गएको विनाशकारी जलवायुजन्य बाढीपछि फिनल्यान्ड सरकार र त्यहाँका जनताले व्यक्त गरेको ऐक्यबद्धता तथा उपलब्ध गराएको मानवीय सहायताप्रति आभार व्यक्त गरे।
उनले विपद्पछिको पुनःस्थापना, पुनर्निर्माण, प्रभावित समुदायको पुनर्वास तथा जलवायु परिवर्तनले जनजीवन र पर्वतीय पारिस्थितिक प्रणालीमा पारेको प्रभावबारे जानकारी गराए।
भेटमा नेपाल र फिनल्यान्डबीच व्यापार, लगानी, ऊर्जा, पूर्वाधार विकास, वन संरक्षण, प्रविधि तथा जलवायु कार्यका क्षेत्रमा सहकार्य विस्तार गर्ने विषयमा छलफल भएको जनाइएको छ।
दुवै मन्त्रीले दुई देशबीचको मैत्रीपूर्ण सम्बन्ध र आपसी सहयोगलाई थप सुदृढ बनाउने प्रतिबद्धता व्यक्त गरेका छन्।
