काठमाडौं, ६ असोज । आम जनता पार्टी (आजपा) का अध्यक्ष तथा पूर्वमन्त्री प्रभु साहले राष्ट्रिय स्वतन्त्र पार्टी (रास्वपा) भित्रै प्रधानमन्त्री वालेन्द्र शाहलाई असफल बनाउने प्रयास भइरहेको आरोप लगाएका छन्।
शुक्रबार रौतहटको गरुडामा अग्रगामी मोर्चाको नगर कमिटीद्वारा आयोजित शुभकामना कार्यक्रममा बोल्दै साहले सरकार गठन भएको छ महिना नपुग्दै प्रधान मन्त्रीलाई विस्थापित गर्ने रणनीति बनाइएको दाबी गरे।
उनले रास्वपा सभापति रवि लामिछाने, अर्थमन्त्री स्वर्णिम वाग्ले र सभामुख डिपी अर्यालबीचको गतिविधिलाई शंकास्पद भन्दै उनीहरूको विदेश भ्रमणबारे पनि प्रश्न उठाए। प्रधानमन्त्री शाहलाई आगामी स्थानीय तहको निर्वाचनसम्म मात्रै उपयोग गर्न खोजिएको उनको आरोप थियो।
साहले रास्वपाको नेतृत्व चुनाव र सत्ताकेन्द्रित भएको आरोप लगाउँदै देश र जनताको हितभन्दा पद प्राप्तिलाई प्राथमिकता दिएको टिप्पणी गरे। उनले सामाजिक सञ्जालमा रास्वपाका समर्थकबाट हुने गालीगलौजप्रति पनि असन्तुष्टि जनाउँदै सचेत रहन आग्रह गरे।
