काठमाडौं, ५ कार्तिक। पूर्वराष्ट्रपति एवं नेकपा एमालेकी वरिष्ठ नेता विद्यादेवी भण्डारी बिहीबार चीन प्रस्थान गरेकी छन्।
चीनको स्योङआनमा अक्टोबर २३ देखि २५ सम्म आयोजना हुने ‘ग्लोबल गभर्नेन्स फोरम’मा सहभागी हुन उनी चीन गएकी हुन्। सक्रिय राजनीतिमा फर्किएपछि भण्डारीको यो पहिलो विदेश भ्रमण हो।
‘परिवर्तनशील विश्वमा विश्वास र सहकार्यको पुनर्निर्माण’ मुख्य विषय रहेको सम्मेलनमा भण्डारीले विशिष्ट अतिथिका रूपमा सम्बोधन गर्ने कार्यक्रम छ।
फोरममा विश्व शान्ति, बहुपक्षीय सहकार्य, विकासशील राष्ट्रको भूमिका, अन्तर्राष्ट्रिय व्यापार, जलवायु परिवर्तन, दिगो विकास, कृत्रिम बौद्धिकता र साइबर सुरक्षालगायत विषयमा छलफल हुनेछ।
चाइनिज पिपल्स इन्स्टिच्युट अफ फरेन अफेयर्सले आयोजना गरेको सम्मेलनमा करिब १०० देशका राजनीतिक, कूटनीतिक, व्यावसायिक तथा सञ्चार क्षेत्रका प्रतिनिधिहरू सहभागी हुनेछन्। भण्डारी आगामी सोमबार स्वदेश फर्कने कार्यक्रम रहेको छ।
