काठमाडौं, १४ असोज । नेकपा (एमाले) का अध्यक्ष केपी शर्मा ओलीले गण्डकी, लुम्बिनी, कर्णाली र सुदूरपश्चिम प्रदेशका नेता तथा सचिवालय सदस्यलाई भर्चुअल माध्यमबाट सम्बोधन गरेका छन्।
च्यासलस्थित पार्टी कार्यालयबाट सम्बोधन गर्दै ओलीले हालै सम्पन्न केन्द्रीय कमिटी बैठकले तय गरेका निर्णय र कार्यभार प्रभावकारी रूपमा कार्यान्वयन गर्न पार्टीका प्रदेश तथा जिल्ला तहका नेताहरूलाई निर्देशन दिए।
उनले ‘लोकतन्त्रको पुनर्बहाली’ र आगामी वैशाखमा हुने स्थानीय तह निर्वाचनको तयारीलाई पार्टीको मुख्य कार्यभारका रूपमा अघि बढाउनुपर्ने बताएका छन्। साथै संगठनलाई एकताबद्ध बनाएर निर्वाचन केन्द्रित गतिविधि तीव्र बनाउन आग्रह गरेका छन्।
यसअघि मंगलबार ओलीले कोशी, मधेस, बागमती, उपत्यका विशेष तथा सम्पर्क समन्वय प्रदेशका सचिवालय सदस्यलाई भर्चुअल सम्बोधन गरेका थिए।
