काठमाडौँ, १ असोज । राष्ट्रिय स्वतन्त्र पार्टी (रास्वपा) का महामन्त्री विपिन आचार्यले फरक मत राख्ने सांसदविरुद्ध भइरहेको भौतिक आक्रमणको प्रयास र धम्कीको निन्दा गरेका छन्।
प्रतिनिधिसभाको बैठकमा बोल्दै उनले अभिव्यक्ति स्वतन्त्रता र लोकतान्त्रिक सहिष्णुतामाथि चुनौती देखिएको बताए। सिंहदरबार अगाडि सांसदलाई घिसार्ने, घर जलाउने तथा रक्तपात गर्ने जस्ता धम्की आउनु गम्भीर विषय भएको उनको भनाइ छ।
आचार्यले यस्ता धम्की र अराजक गतिविधिमा संलग्नलाई तत्काल कानुनी कारबाही गर्न प्रधानमन्त्री र गृहमन्त्रीको ध्यानाकर्षण गराएको बताए। सांसदहरूको सुरक्षा सुनिश्चित गर्नु राज्यको जिम्मेवारी भएको उनले उल्लेख गरे।
