जनकपुर, १७ साउन। नेपाल रेडक्रस सोसाइटी धनुषाका सभापति पंकज कुमार महतोले तराई–मधेस तथा जनकपुरधाममा सामाजिक सद्भाव, धार्मिक सहिष्णुता र भाइचाराको वातावरण कायम राख्न सबै पक्षसँग अपिल गरेका छन्।
हालैको आन्दोलनको सन्दर्भ उल्लेख गर्दै उनले आफूले सभापतिको जिम्मेवारी सम्हालेयता नेपाल रेडक्रसको मानवीय मूल्य, निष्पक्षता र सेवाभावलाई आत्मसात गर्दै आफ्नो दायित्व इमान्दारीपूर्वक निर्वाह गरेको बताएका छन्।
महतोले कुनै पनि प्रकारका मतभेद संवाद, समझदारी र सहकार्यबाट समाधान हुनुपर्नेमा जोड दिँदै सम्पूर्ण समुदायबीच विश्वास, सम्मान र एकताको वातावरण थप सुदृढ बनाउन सबैलाई आग्रह गरेका छन्।
उनले तराई–मधेसमा शान्ति, अमन–चैन, सुख, समृद्धि र आपसी सद्भाव कायम रहोस् भन्ने कामना गर्दै माता जानकी र भगवान् पशुपतिनाथसँग प्रार्थना गरेका छन्।
