काठमाडौं, ८ असार । कुकुरको टोकाइबाट सर्ने रेबिजविरुद्धको एन्टिरेबिज भ्याक्सिन -एआरभी) देशभर अभाव भएको छ ।
सरकारले समयमै खोप खरिद गर्न नसक्दा सरकारी स्वास्थ्य संस्थामा खोपको संकट देखिएको हो । काठमाडौंको टेकुस्थित शुक्रराज ट्रपिकल तथा सरुवा रोग अस्पतालमा समेत खोप अभाव भएपछि कुकुरले टोकेका धेरै बिरामी प्रभावित भएका छन् ।
स्वास्थ्य मन्त्रालयले अन्तर्राष्ट्रिय बजारमा मूल्यवृद्धि र पटक–पटक टेन्डर असफल हुँदा खरिद प्रक्रिया ढिलाइ भएको जनाएको छ । मन्त्रालयका अनुसार हाल ४,५०० भायल खोप आकस्मिक रूपमा भित्रिएको छ भने करिब ५ लाख भायल खरिद प्रक्रिया अन्तिम चरणमा पुगेको छ ।
विशेषज्ञहरूले कुकुरले टोकेपछि जतिसक्दो छिटो खोप लगाउनुपर्ने र लक्षण देखिएपछि रेबिज प्रायः घातक हुने चेतावनी दिएका छन् । स्वास्थ्य सेवा विभागको अनुमान अनुसार नेपालमा रेबिजका कारण वार्षिक करिब १०० जनाको मृत्यु हुने गरेको छ ।
टेकु अस्पतालमा पछिल्लो तीन वर्षमा मात्रै ४६ जनाको रेबिजबाट मृत्यु भएको तथ्यांक छ ।
