महोत्तरी, १२ फागुन । महोत्तरी निर्वाचन क्षेत्र नं. २ बाट प्रतिनिधिसभा सदस्यका उम्मेदवार डा. राकेश मण्डलले फरक र रचनात्मक शैलीमार्फत चुनावी प्रचारलाई तीव्र बनाएका छन् ।
परम्परागत भाषण र सभा भन्दा बाहिर निस्कँदै उनले चौक–चौराहा, गाउँ–टोल र सार्वजनिक स्थलमा पुगेर प्रत्यक्ष रूपमा मतदातासँग संवाद गरिरहेका छन् । चिसो मौसमलाई मध्यनजर गर्दै गाउँ–गाउँमा जाडो छल्न बालिने ‘घुर’को छेउमा बसेर मतदातासँग कुरा गर्ने दृश्यले स्थानीयको ध्यान तानेको छ ।
उनले आफ्ना चुनावी ब्यानर र चुनाव चिन्ह देखाउँदै सरल भाषामा मत मागिरहेका छन् । पछिल्लो समय मण्डलले सडक नाटकलाई प्रचारको मुख्य माध्यम बनाएका छन् ।
सडक नाटकमार्फत शिक्षा, स्वास्थ्य, रोजगारी र स्थानीय विकासका मुद्दालाई कलात्मक ढंगले प्रस्तुत गर्दै उनले मतदातालाई आफ्नो एजेन्डा बुझाइरहेका छन् । 
यस किसिमको अभियानले विशेषगरी युवा र महिला मतदाताको आकर्षण बढाएको स्थानीयहरू बताउँछन् । डा. मण्डलले आफू निर्वाचित भए शिक्षा र स्वास्थ्य सेवामा पहुँच बढाउने, रोजगारी सिर्जना गर्ने र स्थानीय तहको समग्र विकासमा प्राथमिकता दिने प्रतिबद्धता व्यक्त गरेका छन् ।
