जनकपुर, १२ फागुन । धनुषा निर्वाचन क्षेत्र नं. ४ मा नेकपा एमालेका प्रतिनिधिसभा सदस्य उम्मेदवार रघुविर महासेठ यतिखेर घरदैलो अभियानमा सक्रिय देखिएका छन् ।
गाउँ–बस्ती र टोलटोलमा पुगेर मतदातासँग प्रत्यक्ष संवाद गर्दै उनले आफ्ना एजेन्डा प्रस्तुत गरिरहेका छन् । घरदैलोका क्रममा स्थानीय मतदाताले महासेठप्रति विश्वास व्यक्त गर्दै पुनः विजयी गराउने प्रतिबद्धता जनाएको बताइएको छ ।
मतदाताले विकास निर्माण, पूर्वाधार र क्षेत्रीय समृद्धिमा उनले अघिल्लो कार्यकालमा खेलेको भूमिकाको प्रशंसा गर्दै निरन्तरताको आवश्यकता औँल्याएका छन् ।
महासेठ पछिल्लो प्रतिनिधिसभा निर्वाचनमा पनि यही क्षेत्रबाट निर्वाचित भएका थिए । उनले अनुभव र निरन्तरताका आधारमा क्षेत्रको विकासलाई अझ तीव्र बनाउने प्रतिबद्धता जनाउँदै आएका छन् ।
निर्वाचन नजिकिँदै जाँदा धनुषा–४ मा चुनावी गतिविधि थप तीव्र बन्दै गएको छ ।
