काठमाडौँ, २७ मंसिर । प्रधानमन्त्री सुशीला कार्कीले नेपाल प्रिमियर लिग (एनपिएल) ले नेपाललाई विश्वसामु शान्त, सुन्दर र सक्षम राष्ट्रका रूपमा चिनाउन महत्वपूर्ण भूमिका खेलेको बताएकी छिन् ।
आज सम्पन्न हुँदै गरेको एनपिएलको फाइनल खेलको अवसरमा प्रधानमन्त्री कार्कीले सामाजिक सञ्जाल फेसबुकमार्फत फाइनलमा प्रतिस्पर्धा गर्ने सुदूरपश्चिम रोयल्स र लुम्बिनी लायन्स दुवै टिमलाई शुभकामना व्यक्त गरेकी हुन् ।
प्रधानमन्त्री कार्कीले एनपिएल केवल खेलकुद प्रतियोगिता मात्र नभई राष्ट्रिय एकता र आत्मविश्वासको प्रतीक बनेको उल्लेख गरेकी छिन् । उनका अनुसार एनपिएलमार्फत नेपाली क्रिकेटको स्तर मात्र उकासिएको छैन, देशको पर्यटन, अन्तर्राष्ट्रिय छवि र युवामा सकारात्मक ऊर्जा फैलिएको छ ।
उनले खेलकुद कूटनीतिमार्फत नेपालले विश्व समुदायमा आफूलाई सक्षम राष्ट्रका रूपमा प्रस्तुत गर्न सफल भएको पनि बताइन् ।
