जनकपुर, २७ मंसिर। नेपाली कांग्रेस मधेस प्रदेश कार्यसमितिको बैठक आज मधेस प्रदेश पार्टी कार्यालयमा सम्पन्न भएको छ। बैठक समितिका सभापति एवं मधेस प्रदेश सरकारका मुख्यमन्त्री कृष्ण प्रसाद यादवको अध्यक्षतामा बसेको हो।
बैठकमा मुख्यमन्त्री यादवले प्रदेश सभाबाट विश्वासको मत प्राप्त गरिसकेपछि अबको पहिलो प्राथमिकता मधेस प्रदेशमा सुशासनलाई मजबुत बनाउँदै आम जनताले प्रत्यक्ष अनुभूति गर्ने खालका काम अघि बढाउने रहेको स्पष्ट पारे।
उनले प्रशासनिक पारदर्शिता, सेवा प्रवाहको प्रभावकारिता र जनउत्तरदायी शासन प्रणालीलाई सुदृढ गर्ने विषयमा पार्टी पंक्ति एकताबद्ध भएर लाग्नुपर्नेमा जोड दिए।
त्यसैगरी बैठकमा पार्टीको आगामी केन्द्रीय महाधिवेशनलाई सफल बनाउन मधेस प्रदेशका सबै नेता तथा कार्यकर्तालाई आ–आफ्नो क्षेत्रबाट व्यवस्थित र सक्रिय रूपमा लाग्न निर्देशन दिइएको छ।
महाधिवेशनका लागि सक्षम, योग्य र पार्टीप्रति निष्ठावान उम्मेदवार सिफारिस गर्न तथा संगठन सुदृढीकरणमा ध्यान दिन आग्रह गरिएको छ।
