काठमाडौं, २४ मंसिर । गत भदौ २३ र २४ गते देशभर प्रदर्शनमा उत्रिएको जेनजी आन्दोलनलाई वैधानिकता प्रदान गर्ने प्रक्रिया अन्ततः निष्कर्षमा पुग्ने भएको छ ।
यसका लागि नेपाल सरकार र जेनजी पक्षका प्रतिनिधिबीच आज औपचारिक सम्झौता हुने प्रधानमन्त्री तथा मन्त्रिपरिषद्को कार्यालयले जनाएको छ ।
सरकार र जेनजी आन्दोलनका प्रतिनिधिहरूबीच पछिल्ला दिनहरूमा पटक–पटक वार्ता गर्दै आएको थियो । ती वार्ताहरूको निष्कर्ष स्वरूप तयार पारिएको सम्झौता–ड्राफ्टलाई अन्तिम रूप दिइसकिएको तथा अब दुवै पक्षले हस्ताक्षर मात्र बाँकी रहेको सरकारका एक वरिष्ठ अधिकारीले जानकारी दिएका छन् ।
प्रधानमन्त्री सुशीला कार्कीको सचिवालयका अनुसार सम्झौतामा हस्ताक्षर कार्यक्रम आज साँझ ६ बजे सिंहदरबारस्थित प्रधानमन्त्री तथा मन्त्रिपरिषद्को कार्यालयको सगरमाथा हलमा निर्धारण गरिएको छ ।
कार्यक्रममा प्रधानमन्त्री, मन्त्रीस्तरीय टोली, जेनजी प्रतिनिधि तथा अन्य सरोकारवालाहरूको उपस्थिति रहने अपेक्षा गरिएको छ । सम्झौताले जेनजी आन्दोलनको वैधानिक पहिचान, आन्दोलनका मागका विषयमा सहमतिका बुँदा, तथा आगामी कार्यान्वयन प्रक्रियालाई स्पष्ट रूपरेखा दिने बताइएको छ ।
सम्झौता हस्ताक्षर भएपछि आन्दोलन औपचारिक रूपमा संयोजन र राज्य संरचनासँग समन्वित ढङ्गले अघि बढ्न सक्ने सरकारको भनाइ छ ।
