काठमाडौं, २४ मंसिर । राष्ट्रपति रामचन्द्र पौडेलले आगामी फागुन २१ गते हुने प्रतिनिधिसभा सदस्य निर्वाचनलाई मानव अधिकारमैत्री बनाउन सबैको सहयोग आवश्यक रहेको बताएका छन् ।
७७ औँ अन्तरराष्ट्रिय मानव अधिकार दिवसका अवसरमा दिएको सन्देशमा उनले हालको राजनीतिक परिस्थितिले राष्ट्रिय तथा अन्तरराष्ट्रिय समुदायको ध्यान आकर्षित गरेको भन्दै सरकार, राजनीतिक दल, नागरिक समाज, युवापुस्ता र सर्वसाधारणले संयमित र सकारात्मक भूमिका खेल्नुपर्नेमा जोड दिएका छन् ।
राष्ट्रपतिले संविधानले सुनिश्चित गरेका मौलिक हकको पूर्ण कार्यान्वयन तथा मानव अधिकारको सम्मान, संरक्षण र प्रवर्धनका लागि तीनै तहका सरकार, सामाजिक संस्था, सञ्चारमाध्यम र निजी क्षेत्र सबै सक्रिय हुनुपर्ने आवश्यकता औंल्याए ।
