जनकपुर, २३ मंसिर । जनकपुरमा मृत्यक रोशनी झासँग सम्बन्धित सन्कास्पद घटना सार्वजनिक भएपछि जिल्ला तथा केन्द्र दुवै तहमा छानबिन प्रक्रिया तीव्र बनाइएको छ ।
घटना संवेदनशील र गम्भीर प्रकृतिको मानिँदै आएको छ, जसले स्थानीय समुदायदेखि राजनीतिक तहसम्म चासो बढाएको छ । घटनापछि पूर्वमन्त्री जुली कुमारी महतो निरन्तर रूपमा सक्रिय देखिएकी छन् ।
उनले धनुषाका प्रहरी प्रमुख (एसपी), केन्द्रीय अनुसन्धान ब्यूरो (सीआईबी)का उच्च अधिकारीहरू तथा काठमाडौंस्थित सम्बन्धित निकायहरूसँग निरन्तर सम्पर्क र समन्वय गर्दै छानबिनलाई प्रभावकारी, निष्पक्ष र तीव्र गतिमा अघि बढाउन आग्रह जनाएको छ ।
पीडित परिवारले घटनामा सत्य ओझेल पर्ने तथा प्रभाव जम्ने सम्भावनाप्रति चिन्ता व्यक्त गर्दै आएका बेला पूर्वमन्त्री महतोले घटनाको तथ्य–सत्य बाहिर ल्याउन र दोषीमाथि कठोर कानुनी कारबाही सुनिश्चित गर्न आफैं अग्रसर भूमिका खेलेको उनको सचिवालयले जनाएको छ ।
उता, प्रहरी प्रशासनले घटनालाई उच्च प्राथमिकतामा राख्दै प्राविधिक तथा वस्तुगत आधारहरू सङ्कलन गर्ने कामलाई तीव्र बनाएको छ ।
यसक्रममा मोबाइल विवरण, घटनास्थलको भौतिक प्रमाण, प्रत्यक्षदर्शीका बयान तथा डिजिटल प्रमाणहरूको विश्लेषणमार्फत वास्तविकता नजिक पुग्ने प्रयास भइरहेको बताइएको छ ।
प्रहरी स्रोतका अनुसार प्रारम्भिक सूचनाका आधारमा विभिन्न कोणबाट अनुसन्धान अघि बढाइएको छ र आवश्यकता परे थप प्राविधिक टोली धनुषा पठाउने तयारीसमेत गरिएको छ ।
