जनकपुर, २२ मंसिर । जनकपुरमा जेसीआई नेपाल (Junior Chamber International Nepal) को ५२औँ राष्ट्रिय महाधिवेशन आगामी पुस ४ देखि ७ गतेसम्म तिरहुतिया गाछीमा आयोजना हुने भएको छ ।
महाधिवेशनमा देशभरका १८६ शाखाका पदाधिकारी, अन्तर्राष्ट्रिय अतिथि, तथा करिब ४ हजार सहभागी आउने जनाइएको छ । जेसीआई जनकपुरका अध्यक्ष मुकेश कुमार साहका अनुसार, संरचनात्मक, प्राविधिक, सुरक्षा तथा आतिथ्य–व्यवस्थासहितका सबै तयारी अन्तिम चरणमा पुगेका छन् ।
महाधिवेशनको उद्देश्य जनकपुरको सांस्कृतिक, धार्मिक र पर्यटकीय पहिचानलाई राष्ट्रिय तथा अन्तर्राष्ट्रिय रूपमा प्रवद्र्धन गर्नु रहेको पनि आयोजकले बताएको छ ।
राष्ट्रिय महाधिवेशनका प्रबन्ध निर्देशक तथा जेसीआई जनकपुरका पूर्व अध्यक्ष सुधिर पंजियारले कार्यक्रमका लागि करिब ३ करोड ५ लाख रुपैयाँ खर्च हुने अनुमान प्रस्तुत गरे ।
उनका अनुसार, ठूलो संख्यामा सहभागी हुने भएकाले व्यवस्थापनलाई उच्च प्राथमिकता दिइएको छ । यद्यपि, उद्घाटन सत्रका प्रमुख अतिथि चयनमा अन्योल रहेको आयोजकको भनाइ छ ।
राजनीतिक परिवेश, उच्च पदस्थ व्यक्तिहरूको स्वास्थ्य अवस्था तथा प्राविधिक कारणले निर्णयमा ढिलाइ भएको हो। प्रधानमन्त्री सुशिला कार्कीलाई प्रमुख अतिथि बनाउन पहल भइरहेको भए पनि निश्चित भइसकेको छैन ।
सल्लाहकार रमेश साहका अनुसार, नेपालमा यति ठूलो तथा व्यवस्थित रूपमा महाधिवेशन हुन लाग्नु अभूतपूर्व हो । जनकपुरधाममा यसअघि पनि चारपटक—१९७७, १९९३, २००३ र २०१८—मा जेसीआईको महाधिवेशन भव्य रूपमा सम्पन्न भइसकेको स्मरण उनले गराए ।
