जनकपुर, २१ मंसिर । मधेस प्रदेशमा कांग्रेसले नेकपा एमालेसँगको गठबन्धन टुटाएपछि एमाले राजनीतिक रूपमा एक्लिएको छ ।
एमाले संसदीय दलका नेता सरोज यादवको विवादास्पद नियुक्ति, प्रदेश प्रमुखको बर्खास्ती र विश्वासको मत नपाई राजीनामा जस्ता घटनाले मधेसमा एमालेको पकड कमजोर बनेका छन ।
कांग्रेस, जसपा, जनमत, माओवादी, लोसपा लगायत दलको समर्थनमा कांग्रेसका कृष्णप्रसाद यादव मुख्यमन्त्री बनेपछि ७ प्रदेशमध्ये मधेसमा मात्रै गठबन्धन भत्किएको छ ।
यद्यपि कांग्रेस र एमाले दुवैले अन्य प्रदेशमा गठबन्धन संकट नआउने दाबी गरेका छन् । कोशी, बागमती, गण्डकी, लुम्बिनी, कर्णाली र सुदूरपश्चिममा दुवै दल एकअर्काको समर्थनमा सरकार चलाइरहेका छन् ।
कतिपय प्रदेशमा गठबन्धन फाटेमा वैकल्पिक संयोजन संभव देखिए पनि तत्काल ठूलो असर नपर्ने राजनीतिक विश्लेषकहरुले बताउछन ।
