जनकपुर, २१ मंसिर । मधेश प्रदेशमा मुख्यमन्त्री कृष्णप्रसाद यादवले तीन जना मन्त्री नियुक्त गरेका छन् ।
हालै मात्र पदभार सम्हालेका मधेश प्रदेशका नवनियुक्त मुख्यमन्त्री कृष्णप्रसाद यादवले प्रदेश सरकारलाई पूर्णता दिन मन्त्रिपरिषद् विस्तार गर्दै तीनजना नवनियुक्त मन्त्रीहरूको नाम सार्वजनिक गरेका हुन् ।
नयाँ मन्त्रिमण्डलमा नेपाली कांग्रेस, जनमत पार्टी र नेकपा (एकीकृत समाजवादी)बाट एक–एक जना मन्त्री समावेश भएका छन् । मुख्यमन्त्री यादवले नेपाली कांग्रेसबाट जंगीलाल राय, जनमत पार्टीबाट महेश प्रसाद यादव र एकीकृत समाजवादीबाट कनिस पटेललाई मन्त्रिपरिषद्मा ल्याएका हुन् ।
यस मध्ये जनमत पार्टीका महेश प्रसाद यादवलाई अर्थ मन्त्रालयको जिम्मेवारी दिइएको छ, जबकि कांग्रेसका जंगीलाल राय र एकीकृत समाजवादीका कनिस पटेलको मन्त्रालय भने अहिले तय भएको छैन ।
उनीहरूको मन्त्रालयको जिम्मेवारी चाँडै तोकिने प्रदेश सरकारका स्रोतहरूले जनाएका छन् । नवनियुक्त मन्त्रीहरूले प्रदेश प्रमुख डा. सुरेन्द्र लाभ कर्ण समक्ष पद तथा गोपनीयताको शपथ ग्रहण गरेका छन् ।
शपथ ग्रहणसँगै प्रदेशको मन्त्रीपरिषद् विस्तारको पहिलो चरण पूरा भएको छ र सरकार अब पूर्णरूपमा सक्रिय भएको बताएको छ ।
