जनकपुर, २० मंसिर । नेपाली कम्युनिष्ट पार्टीका नेता तथा पूर्व प्रधानमन्त्री झलनाथ खनालले समाजवादी लोकतन्त्रको स्थापनाका लागि नै नेपाली कम्युनिष्ट पार्टीको जन्म भएको बताएका छन्।
उनले वर्तमान राजनीतिक प्रणालीले गरिब, श्रमिक, सीमान्तकृत समुदाय र पिछडिएका वर्गका अपेक्षा पूरा गर्न नसकेको टिप्पणी गरे।
जनकपुरमा आयोजित पार्टीको एकता सन्देश सभालाई सम्बोधन गर्दै खनालले २०६२/६३ को जनआन्दोलनले मुलुकमा मुख्यतः पूँजीवादी लोकतन्त्र स्थापना गरेको उल्लेख गरे।
उनका अनुसार उक्त व्यवस्थाले राजनीतिक अधिकार त स्थापित गर्यो, तर सामाजिक न्याय र आर्थिक समानताको लक्ष्य हासिल गर्न सकेन। खनालले वर्तमान अवस्थामा गरिब, दलित, महिला, आदिवासी जनजाति तथा सीमान्तकृत समुदाय झन् पछाडि धकेलिँदै गएको बताए।
उनले सामाजिक न्याय, समानता र समावेशीताका सवाल अझै अधुरै रहेको धारणा राखे।
“देशलाई सही दिशातर्फ लैजान अब समाजवादी लोकतन्त्रको मार्ग रोज्नैपर्छ,” खनालले भने, “त्यसैका लागि नेपाली कम्युनिष्ट पार्टी स्थापना भएको हो र हामी यही लक्ष्यमा प्रतिबद्ध छौँ।
उनले परिवर्तनलाई संस्थागत गर्न सबै प्रगतिशील शक्ति एकजुट हुनुपर्ने आवश्यकता औँल्याउँदै जनताको हक अधिकार सुनिश्चित गर्ने नीति र कार्यक्रम ल्याउन सरकार र राजनीतिक नेतृत्वलाई आग्रह गरे।
