काठमाडौं, ७ कार्तिक । निर्वाचन आयोगले हाल १५ नयाँ राजनीतिक दल दर्ताका निवेदनहरूको कागजात अध्ययन गरिरहेको जनाएको छ ।
तीमध्ये १० दलले प्रतिनिधिसभा निर्वाचन घोषणा हुनु अघि र ५ दलले घोषणा पछि दर्ताको निवेदन दिएका हुन् । दर्ता प्रक्रिया पूरा भएका दललाई मात्रै स्वीकृति दिइने आयोगका प्रवक्ता नारायणप्रसाद भट्टराईले बताए ।
हालसम्म आयोगमा १२४ दल दर्ता भइसकेका छन् । दर्ताका लागि दलले विधान, नियमावली, घोषणापत्र, चिन्ह, झण्डा, लोगो लगायतका आवश्यक कागजात पेश गर्नुपर्छ ।
आयोगले दर्ता निवेदन स्वीकृत भएमा ४५ दिनभित्र निर्णय गर्ने प्रावधान छ । निर्वाचन प्रयोजनका लागि दल दर्ताको सूचना कात्तिक २८ गते प्रकाशित हुने र मङ्सिर १ देखि १० गतेसम्म नयाँ दलले आवेदन दिन पाउने छन् ।
