काठमाडौं, असोज २६ । सञ्चार तथा सूचना प्रविधि मन्त्री जगदिश खरेलले सामाजिक सञ्जालमार्फत फैलिरहेको फेक समाचार (नक्कली सामग्री) नियन्त्रण गर्न प्रेस काउन्सिल नेपाललाई थप सक्रिय हुन सुझाव दिएका छन् ।
प्रेस काउन्सिलको भ्रमणका क्रममा मन्त्री खरेलले अहिले सामाजिक सञ्जालमा एआई (कृत्रिम बौद्धिकता) द्वारा बनाइएका भ्रामक कन्टेन्ट र झुटा समाचारले समाजमा भ्रम फैलाइरहेको उल्लेख गर्दै यस्तो विकृति नियन्त्रण गर्न काउन्सिलले जनशक्ति विस्तार गरी टास्क फोर्स गठन गर्नुपर्ने जनाए ।
२० हजारभन्दा बढी सामाजिक सञ्जाल प्लेटफर्महरू सञ्चारमाध्यममार्फत सञ्चालनमा छन्। तीमध्ये धेरैजसो नियमनबाहिर देखिन्छन्। गलत सूचना फैलन नदिन हामीले अब कडाइ गर्नैपर्छ।
सञ्चारमन्त्री खरेलले प्रेस काउन्सिललाई स्वतन्त्र र प्रभावकारी रूपमा काम गर्नुपर्नेमा जोड दिए । उनले हालको सरकार छोटो अवधिको भए पनि दायित्वबाट नहट्ने स्पष्ट पारे ।
मन्त्रीका अनुसार, निजी प्रयोगकर्ताका सामाजिक सञ्जालको निगरानी अन्य सरकारी निकायले गर्ने र मिडिया हाउसहरूले सञ्चालन गर्ने सामाजिक सञ्जालको अनुगमन, नियमन र कारबाहीको जिम्मा प्रेस काउन्सिलले लिनुपर्ने छ ।
उनले काउन्सिललाई एक साताभित्र योजनाबद्ध ढंगले फेक समाचार र सामाजिक सञ्जाल नियमनसम्बन्धी कार्ययोजना ल्याउन निर्देशन पनि दिएका छन्।
