धनगढी, २५ असोज। कैलाली जिल्लाको घोडाघोडी नगरपालिका–८ मा शुक्रबार राति भएको आपसी विवादका क्रममा एक युवकको विभत्स हत्या भएको छ।
मृतकको टाउको रेटेर हत्या गर्ने दुई जना आरोपितले टाउको बोकेरै प्रहरी कार्यालयमा आत्मसमर्पण गरेका छन्। जिल्ला प्रहरी कार्यालय कैलालीका प्रवक्ता प्रहरी नायब उपरीक्षक (डीएसपी) राजकुमार सिंहका अनुसार, सुर्खेतको चौकुने गाउँपालिका–३ घर भएका २८ वर्षीय केशरसिंह बुढालाई सोही ठाउँमा रहेका दुई युवकले धारिलो हतियार प्रयोग गरी घाँटी रेटेर हत्या गरेका हुन्।
हत्या पछि १८ वर्षीय बलबहादुर बि.क. र १९ वर्षीय गंगा बुढा क्षेत्री नामका युवकहरू मृतकको टाउको बोकेर राति नै इलाका प्रहरी कार्यालय सुखडमा पुगेका थिए।
उनीहरूलाई प्रहरीले नियन्त्रणमा लिएर विस्तृत अनुसन्धान सुरु गरेको जनाएको छ। प्रहरीका अनुसार घटना स्थानीय खाजा पसलमा भएको हो। तीनै जना खाजा खाने क्रममा मदिरा सेवन गरिरहेका बेला सामान्य विवाद चर्किँदै गएपछि घटनाले भयावह रूप लिएको थियो।
विवादकै क्रममा बलबहादुर र गंगाले धारिलो हतियार प्रयोग गरी बुढाको घाँटी रेटेको प्रहरीले बताएको छ। घटनास्थलमा अहिले प्रहरी टोली परिचालन गरिएको छ भने शव अझै उठाइएको छैन। मृतकका आफन्तहरू सुर्खेतबाट कैलालीतर्फ आउँदै छन्।
