काठमाडौं, ३ भदौ । नेकपा (माओवादी केन्द्र) का अध्यक्ष तथा पुर्ब प्रधानमन्त्री पुष्पकमल दाहाल ‘प्रचण्ड’ले प्रतिनिधिसभाकी उपसभामुख इन्दिरा रानालाई हटाउने प्रयास असंवैधानिक, अन्यायपूर्ण र पूर्वाग्रहपूर्ण भएको टिप्पणी गरेका छन् ।
पार्टीको पदाधिकारी बैठकपछि सोमबार पार्टी केन्द्रीय कार्यालय, पेरिस डाँडामा सञ्चारकर्मीहरूसँग कुरा गर्दै उनले सत्तारूढ दल नेपाली कांग्रेस र प्रमुख प्रतिपक्षी नेकपा (एमाले) दुवैले रानालाई हटाउने चलखेल सुरु गरेको बताएका हुन् ।
उनले भने, “उहाँहरूको उपसभामुख हटाउने कुरा धेरै पहिलेदेखिको हो। तर त्यो गलत गर्दै हुनुहुन्छ। यो सरकार बनेदेखि नै गल्ती गरिरहनुभएको छ ।
प्रचण्डले उपसभामुख रानाविरुद्ध पेश गरिएका आरोपहरू प्रमाणबिनाको कपोकल्पित आरोप भएको जिकिर गरे । उनले रानालाई हटाउने प्रयासलाई महिला, आदिवासी, जनजाति र सामाजिक सेवा क्षेत्रमा क्रियाशील व्यक्तित्वप्रति गरिएको अन्यायका रूपमा व्याख्या गरे ।
एक महिला, आदिवासी, जनजाति महिला, सामाजिक सेवा गर्ने, बालबच्चाको हेरचाह गर्ने, अन्तर्राष्ट्रिय ख्यातिप्राप्त महिलालाई हटाउने कसरत गलत छ।
यसको हामी विरोध गर्छौं,“ प्रचण्डले स्पष्ट पारे । उनले इन्दिरा रानाविरुद्ध कुनै ठोस प्रमाण नहुँदाहुँदै राजनीतिक स्वार्थका लागि उनलाई हटाउन खोज्नु लोकतान्त्रिक मूल्यमान्यताविपरीत रहेको बताए ।
