सिरहा, ९ असार । सिरहाको औरही गाउँपालिका–५ स्थित गागन खोलामा निर्माणाधीन पुल नजिकको सडक भासिँदा हुलाकी राजमार्ग अवरुद्ध भएको छ।
सडक भासिएपछि दुर्घटनाको जोखिम बढेकाले सवारीसाधनलाई वैकल्पिक मार्गबाट सञ्चालन गरिएको छ। स्थानीयले पुल निर्माणका क्रममा गरिएको जथाभावी माटो उत्खनन र वर्षाको कटानका कारण सडक भासिएको आरोप लगाएका छन्।
बाहिरबाट सामान्य देखिए पनि सडकको भित्री भाग खोक्रो बनेकाले थप भासिने र ठूलो दुर्घटना हुन सक्ने चेतावनी उनीहरूको छ।
हुलाकी सडक निर्देशनालय, जनकपुरका इन्जिनियर सूर्यनारायण मण्डलले निर्माण कम्पनीलाई तत्काल मर्मत गर्न निर्देशन दिइएको जानकारी दिएका छन्।
मौसम अनुकूल भए सडक पुनः सञ्चालनमा आउन एकदेखि दुई सातासम्म लाग्न सक्ने बताइएको छ।
